Նոյեմբերը Զինված ուժերի տոնացույցում

ՀՀ զինված ուժերի տոնացույցում նոյեմբերի 5-ը նշվում է որպես Հետախույզի օրը, իսկ նոյեմբերի 17-ը՝ Ռազմական բժիշկի օր։

Հետախուզական զորքերի օրը տոն է Հայաստանում, որը նշվում է նոյեմբերի 5-ին: Հայաստանի Զինված ուժերում հետախուզական ստորաբաժանումների ձևավորումն ավարտվել է 1992 թվականին։ 1992 թվականի նոյեմբերի 5-ին կամավորական ջոկատների հիմքի վրա ավարտվեց ՀՀ ԶՈՒ հետախուզական զորամասի ձևավորումը և հենց այդ օրն էլ ավելի ուշ, ՀՀ ԶՈՒ-ում պաշտոնապես ընդունվեց հետախուզական զորքերի օր։

Սկաուտներս հետախույզի օրը նշում ենք, հիշելով մեր ավագ եղբայր Արսենին, ում «смертник» էինք կոչում՝ իր խիզախության համար։ Արսեն Բեգլարյանը (Մամիկոնյանը) մասնակցել է քառօրյա պատերազմին՝ 2016թ․-ին, հերոսացել 2020թ․՝ իր կյանքը զոհաբերելով հանուն Հայրենիքի փրկության։ Արսենը ծնվել է 1986 թ․ հոկտեմբերի 15-ին Երևանում։ Նրան ոգեշնչում և ուրախացնում էր Ամեն ինչը։ Բոլորին օգնելը։ Ժամանակը սիրում էր անցկացնել Ընկերների և բոլորի հետ։ ՈՒներ սիրած էակ ու շատ երազանքներ։ Նրան հիշում ենք ուժեղ, բարի, հավատարիմ, ընկերասեր, հասնող և խորհրդատու մարդ։ Փոքր տարիքից երազում էր դառնալ ամերիկյան զինվորների նման զինվոր։ Յուրահատուկ էր իր ընկերասիրությամբ և բարությամբ։ Վերջին զրույցը
եղել է հոկտեմբերի 25-ին․ «Մա՛մ, որ հանկարծ 1 օր չզանգեմ, չմտածես, շատ հոգնած եմ»։ Վերջին հերոսական մարտը հոկտեմբերի 25-ին Ջաբրաիլում, ապա՝ Զանգելանում։ Գիշերը գործողության ժամանակ վիրավորվել և այնտեղ էլ անմահացել է։

Նոյեմբերի 17-ը Հայաստանում նշվում է որպես ռազմական բժշկի օր: 1922 թ. նոյեմբերի 17-ին տեղի է ունեցել Հայաստանի Զինված Ուժերի ռազմա-բժշկական հոսպիտալի ձևավորումը: Այն հսկայական դեր է խաղացել հայկական բանակի կայացման և ուժեղացման գործում: Այդ օրվանից ի վեր, նոյեմբերի 17-ը ՀՀ Զինված Ուժերում նշվում է որպես Ռազմա-բժշկական աշխատակիցների օր:

Սկաուտներս Ռազմա-բժշկական աշխատակիցների օրը նշում ենք, հիշելով մեր ավագ եղբայր Արեգին, ով հնարավորություն ունենալով փրկվելու, մնացել էր ընկերների կողքին՝ նրանց հետ մարտնչելով մինչև վերջ։

Արեգ Ադուրյանը ծնվել է 2000թ․ օգոստոսի 14-ին Երևանում։ Արեգն ոգեշնչված էր լեռներով, հայրենասեր էր, տաղանդավոր, հասցնում էր միաժամանակ լինել լավագույնը և՛ սկաուտական խմբում, և՛ սկաուտական հանձնախմբերում՝ խմբագրական խմբում, գրքերի հանձնախմբում, փողերախմբում։ Ընկերասեր և հոգատար լինելով, աշխատում էր նաև սկաուտական խմբի փոքրիկների հետ։ Խելացի և նպատակասլաց անձ էր, ով հասնում էր բոլոր նպատակակետերին, սիրում էր լեռները, մնաց բարձունքում։

Նրան հիշում ենք պայծառ, խինդով լի, ընկերասեր ու հայրենասեր՝ միշտ պատրաստ աջակցելու։

Վերջին խոսքը հոկտեմբերի 18-ին էր․ «Գնում ենք, հեռու ենք…»։

Փրկել էր հրամանատարի կյանքը, Արեգը
Բուժակ էր։ Նրա վերջին մարտը 2020 թ․ հոկտեմբերի 19-ին էր՝ Այգեհովիտում։ Արեգ Արտակի Ադուրյանը պարգևատրվել է «Հայրենիքին մատուցած ծառայությունների» 2-րդ աստիճանի շքանշանով։