Օգոստոս 2024
Ինչպե՞ս անցավ մեր օգոստոս ամիսը
Սկաուտական խմբի խմբագրական խմբի անդամներս հետևում ենք խմբի ողջ գործունեությանը և լուսաբանում այն՝ շուտով կհրապարակենք նաև թերթի տեսքով
Օգոստոսի 4 | Փորձառության փոխանցում
Ամառվա մեր որոշմանը հավատարիմ մնալով՝ սկաուտությու բոլորի համար, ամսվա մեկնարկը տվեցինք՝ նախ մեր խմբի փոքրիկներին սկաուտական փորձառություններ փոխանցելով, ապա սկաուտներիս նշանառության հմտությունները փոխանցեցինք, որից հետո միասին խաղացինք` մրցելով միմյանց հետ:
Օգոստոսի 10-11 | Աստղաթափ
Սկաուտներս արտադպրոցական գիտելիք ստանում ենք բանակումների՝ ճամբարների, արշավների, խաղերի և տարատեսակ միջոցառումների միջոցով: Այդպիսի օրերից էին օգոստոսի 10-ն ու 11-ը՝ գիշերակացով հավաք: Հյուրընկալվել էին Աժդահակ հյուրատանը, որի ընդարձակ այգին դարձրել էինք բանակավայր: Ինչպես բոլոր բանակումներին, այս անգամ էլ օրը սկսեցինք տարածքը նախ ուսումնասիրելով, ապա բանակավայրի հարդարմամբ, որին հաջորդելու էր «Աստղաթափ» հայտագիրը՝ տարբեր փորձառություններ հաղթահարելով հավաքեցինք մեր աստղերը, մարզեցինք և ստուգեցինք մեր մարմնի և մտքի ճկունությունը:
Ցավոք եղանակայի վատ պայմանի պատճառով մեզ չհաջողվեց տեսնել աստղաթափը՝ փոխարենը ծանոթացանք աստղադիտակին և մինչ ճրագմարը իրար պատմեցինք հետաքրքրաշարժ պատմությունները, ինչ երեկո առանց երգի՝ մենք էլ վերհիշեցինք և ոգեշնչվեցինք մեր ազգային երգերով, ևս մեկ անգամ թերթելով մեր առցանց երգարանը…
Օգոստոսի 17,18,31 | Լուսէում
Բարությունը սահման չունի՝ օգոստոսի 17-ին, 18 և 31-ին Լուսէ կենտրոնում էինք, ուր մոտ 100 Արցախից բռնի տեղահանված մեր փոքրիկները ստանում են աջակցություն:
«Սկաուտություն բոլորի համար» մեր ծրագրով այս անգամ էլ ուրախացրեցինք աջակցություն ստացող այդ երեխաներին: Չեք պատկերացնի ինչ հաճելի է, երբ կարողանում ես սլաքը դեպի լավ կողմ տանել, որը տարիներ շարունակ անում ենք սկաուտներս:
Ի դեպ «Երեխաները երեխաներին» մարդասիրական ծրագրեր իրականացնում ենք 17 տարի, մեր գործերը լուսաբանելու հարցում շատ համեստ ենք, գիտենք: Գործեք ի բարին…
Շնորհակալություն ենք հայտնում ԹԱԹՅՈՍԱ ընկերությանը՝ մեր ծրագրերը հովանավորելու համար:
Օգոստոսի 18 | Խաղողօրհնեքը
Օգոստոսի 18-ը տոնական էր: Մինչ մեծերն ուրախացնում էին Լուսէ-ում աջակցություն ստացող երեխաներին, մեր փոքրիկները զվարճանում էին, մարզվում, որից հետո ծանոթացան Խաղողօրնեքին, ապա համտեսին օրհնված խաղողը:
Օգոստոսի 25 | Մտերմիկ նախաճաշ
Սկաուտական 2023-2024 տարվա վերջին սկաուտական հավաքը նախաճաշի մտերմիկ սեղանի շուրջ էր: Օգոստոսի 25-ին հավաքվեցինք սովորականի պես՝ դրոշակի արարողություն, մարմնամարզություն, ապա փոքրից մեծ սկսեցինք պատրաստել համեղ նախաճաշ՝ այն ինչ ցանկանում էինք, նույնիսկ ամենափոքրիկները՝ 4-6 տարեկանները, մեր կորյունները, թարմ մրգերից պատրաստեցին ֆրեշ բոլորիս համար… Սեղանի շուրջ վայելեցինք համեղ ուտեսներն ու վերհիշեցինք տարվա գեղեցիկ պահերը:
Նշենք, որ սկաուտներն ու արենուշները նույնպես հանդիպում են շաբաթ օրերին, որտեղ ձեռք են բերում ԱԲԿ՝ Արտադպրոցական Բազմակողմանի Կրթություն, ՆԶԿ՝ Նախազորակոչային կրթություն և Ողջ Մնալու Արվեստի գործնական գիտելիքներ:
Հրապարակումն ընթերցվել է 162 անգամ:
Կարող է նաև հավանեք
Հրեշտակներ ձոր
Նետաձգություն
