Վազգեն Սարգսյանի քայլերով
Հայապահպանման համար կարծում ենք չպետք է մոռանալ մեր մշակույթը, մեր մեծերին և մեր պապերի ապրելակերպը․ պետք է ճանաչենք, վերհիշենք և տարածենք…
Այս անգամ արշավել ենք Աշտարակով, նպատակակետ դնելով մեր Սպարապետի՝ Վազգեն Սարգսյանի, սիրած վայրը։ Վազգեն Սարգսյանը գարնան առաջին օրը դիմավորում էր ԵԿՄ անդամների, իր ընկերների հետ` Աշտարակի ձորում, հին կամրջի մոտ, ջրաղացի քարի վրա բացված սեղանի շուրջ, որի վրա միայն խաշած ձու էր լինում, կանաչի և լավաշ: Այստեղ առանձնահատուկ գեղեցիկ է նաև աշնանը, այդ պատճառով մեր Սպարապետի սիրելի վայր որոշեցինք այցելել հոկտեմբերի 24-ին և վայելել տվյալ վայրի առանձնահատուկ աշնանային գեղեցկությունը։
Սբ. Մարինե եկեղեցում՝ պատարագին մասնակցելով, կարելի է ասել օրհնված, պատմառատ օրվա մեկնարկը տրվեց՝ շրջեցինք Աշտարակի հնադարյա եկեղեցիներով, կանգ առանք Կարմրավորում, անշուշտ նաև մեծն հայ գրող, բանաստեղծ, թարգմանիչ Գևորգ Էմինի գերեզմանաքարի մոտ, ուր հայ գրականության դասերը վերհիշելուց հետո շարժվեցինք նախօրոք գծված ճանապարհով…
Լինել Աշտարակում և չայցելել Պերճ Պռոշյանի տուն-թանգարան անկարելի է: Հետաքրքիր մատուցման համար հայտնում ենք մեր շնորհակալությունը թանգարանի աշխատակիցներին՝ հատկապես Անի Տոներին, Մեծն Հայի կյանքով կիսվելու և մեր հարցերին համբերատար պատասխանելու համար.…
Լի տպավորություններով շարունակեցինք դեպի նպատակակետ՝ Հին կամուրջ, հին ջրաղաց, ուր Սպարապետը տոնում էր գարնանամուտը, այսօր նույն տեղում տեղադրված է հուշաքար…
Նստեցինք նրա սիրելի վայրում՝ ընդմիջեցինք նրա սեղանի շուրջ, որից հետո այցելեցինք կախովի կամուրջ և հիացանք բնության կերտած գեղեցկությամբ:
Պատմության շունչը և Սպարապետի ներկայությունը զգալուց, բնության գեղեցկությունը վայելելուց հետո՝ լցված դրական էներգիայով, վերադարձանք Երևան…
Մեր բոլոր արշավներն ունենք նպատակ, ինչպես մեր բոլոր սկաուտական հավաքները։
Կարող է նաև հավանեք
Փառքի ուղի
Վերելք Հատիս լեռ
